إصدارات دار حاملة المسك
   


إعلانات جامعية

العودة   الجامعة العالمية للقرءان والسنة والقراءات العشر > قسم براعم الجامعة > قسم العلوم الشرعية > محاضرات تمهيدي
التسجيل التعليمات التقويم البحث مشاركات اليوم اجعل جميع المنتديات مقروءة

رد
 
أدوات الموضوع طرق مشاهدة الموضوع
قديم 13 - 09 - 2018, 02:39 PM   #1
منى نور
إدارة قسم البراعم
 
الصورة الرمزية منى نور
 
تاريخ التسجيل: 02 2014
الدولة: مصر
المشاركات: 746
افتراضي تفريغ محاضرات العلوم الشرعية الفصل الدراسى الثانى

تفريغ محاضرات العلوم الشرعية الفصل الدراسى الثانى

للمعلمة ثناء شوقى
منى نور est déconnecté   رد مع اقتباس
قديم 16 - 09 - 2018, 01:57 AM   #2
مشرفة البراعم
طالبة علم بهمــة
 
تاريخ التسجيل: 01 2018
المشاركات: 62
افتراضي رد: تفريغ محاضرات العلوم الشرعية الفصل الدراسى الثانى

بسم الله الرحمن الرحيم
المحاضرة الأولى

12/9/2018
الله الرحمن الرحيم

🌸🌸🌸🌸🌸🌸
اسم من اسماء الله عز وجل

طيب يعنى ايه الرحمن الرحيم

الذي يرحم عباده ويسامحهم ويرعاهم ويوصل لهم ما فيه مصلحتهم
🌷🌷🌷🌷🌷🌷🌷🌷

طيب تعالوا نفكر و نشوف ازاي ربنا رحيم:
🌸🌸🌸🌸🌸

ربنا بيرزقنا كلنا اللي بيسمع كلامه واللي مش بيسمع كلامه
المؤمن والكافر
والطائع والعاصي .
يرزقهم اكل وشرب ولبس
وكل حاجة تخليهم عايشين

لم يحرم احدا من رزقه
🌷🌷🌷🌷🌷🌷
بس المؤمن الطائع ربنا بيرحمه اكتر
ويبارك له في رزقه اكتر و يكتره ويخليه راضي عنه ومبسوط
وكمان يوم القيامة بيدخله الجنة
🌸🌸🌸🌸🌸🌸🌸🌸

ومن رحمته انه ظبط لنا حياتنا
سخر لنا الشمس تنورلنا بالنهار
وجعل مكانها مضبوط لا هي قريبة تلسعنا ولا بعيدة فنبقى بردانين وتعبانين

وسخر لنا القمر ينور لنا بالليل

وسخر لنا الارض نعرف نمشي عليها ونبني عليها بيوتنا

وسخر لنا النبات والحيوانات والطيور علشان ناكل منها ونستخدمها ونعمل منها حاجات كتير تنفعنا في حياتنا

🌸🌸🌸🌸🌸🌸🌸🌸

من رحمته بينا انه خلق لنا عينين نرى بهم
وخلق لنا اذن نسمع بيها
وخلق لنا لسان نتكلم به ونفهم بعض
تخيلوا لو عينينا مش موجودة
غمضوا عينيكم كده
هل عارفين تتحركوا لا ..هل عارفين ...... لا
شوفتم ازاي ربنا رحيم بنا انه خلقلنا عينين
🌷🌷🌷🌷🌷🌷
طيب في ناس مش بيبقى عندهم عنين ربنا برضه رحيم بيهم و سهل لهم حاجات تساعدهم وتعينهم على حياتهم
شفتم ربنا رحيم ازاى
🌸🌸🌸🌸🌸🌸🌸

وكمان من رحمة الله ربنا
انه بيحب الخير
ويحبنا نعمل الخير
واللي بيعمل الخير بيديله حسنات كتير
ويوم القيامة ان شاء الله يدخله الجنة
🌷🌷🌷🌷🌷
من رحمة ربنا ان في جنة كبيرة وجميلة وفيها كل حاجة بنحبها واحسن منها كمان
ندخلها يوم القيامة لما نعمل خير كتير ونتعلم ديننا ونعمل كل حاجة ربنا بيحبها ونبعد عن كل حاجة ربنا مش بيحبها
🌸🌸🌸🌸🌸🌸🌸

كمان من رحمة ربنا انه ارسلنا الرسل زي نبينا محمد صلى الله عليه وسلم علشان تعلمنا ديننا وتعرفنا الحاجات اللي ربنا بيحبها علشان نعملها لان فيها مصلحتنا
والحاجات اللي ربنا مش بيحبها علشان مش نعملها
لان الحاجات دي فيها شر وبتؤذينا فنبعد عنها ومنعملهاش
🌸🌸🌸🌸🌸🌸🌸

وانزل علينا القرآن الكريم كلام الله لما نقراها ونفهمه ونعمل اللي بيقولنا عليه
نرتاح في حياتنا ونبقى مبسوطين وربنا يدينا حسنات كتيير
🌸🌸🌸🌸🌸🌸🌸
كمان من رحمة ربنا انه بيدينا حسنات كتييير على اعمال بسيطة وسهلة
زي الاذكار
فاكرين الذكر اللي بنقوله بعد الوضوء
شوفتم سهل ازاي
عارفين ايه ثوابه
اللي بيقوله هتتفتحله ابواب الجنة الثمانية يدخل من اي باب منهم
شوفتم ربنا بيدينا ثواب عظيم وكتيير على حاجات بسيطة وسهلة نعملها
🌸🌸🌸🌸🌸🌸🌸

وكمان من رحمة ربنا ان اللي بيسمع كلام ربنا ويطيعه ربنا بيعينه ويسهل له انه يعمل طاعات اكتر علشان يديله حسنات اكتر

🌸🌸🌸🌸🌸🌸🌸

ومن رحمة ربنا ان لو في حد مش بيسمع كلام ربنا ومش بيطيعه
ربنا بيمهله ويصبر عليه
يمكن يرجع يسمع كلام ربنا
ويتوب
وييسر له ناس يكلموه وحاجات كتير علشان يعرف الصح ويعمله ويطيع ربنا ويسمع كلام ربنا
🌸🌸🌸🌸🌸🌸🌸

فلو رجع وتاب وسمع كلام ربنا
ربنا بيسامحه ويغفر له ذنوبه اللي عملها قبل كده ويديله حسنات كتير خالص

شفتم ربنا رحيم بينا ازاي
انا بحب ربنا
وانتم كمان أكيد بتحبوا ربنا
مشرفة البراعم est déconnecté   رد مع اقتباس
قديم 19 - 09 - 2018, 07:12 PM   #3
مشرفة البراعم
طالبة علم بهمــة
 
تاريخ التسجيل: 01 2018
المشاركات: 62
افتراضي رد: تفريغ محاضرات العلوم الشرعية الفصل الدراسى الثانى

بسم الله الرحمن الرحيم
المحاضرة الثانية
19/9/2018
🌸🌸🌸🌸🌸🌸🌸
النهاردة هنأخد حديث جميل قوي
حديث إيه يا معلمتى ( عن أنس بن مالك )
مين أنس ابن مالك ... أنس بن مالك كان بيخدم النبي صلى الله عليه وسلم وهو صغير
وكان بيحكي للمسلمين عن النبي صلى الله عليه وسلم أد إيه كان بيعامله كويس و مكنش بيقعد يقوله على حاجة تزعلهولا كان بيقوله أنت عملت ده يا أنس ولا لسة ؟! ولا كان بيقوله ليه معلمتش ده !!
يعني ف ناس لما يكون حد عندها بيخدمهم يقعدوا بقه يقوله أعملى ده أنت ، معملتش ده ليه وتقعد تشخط ، طيب أنا مش هديك فلوس أنت مهملة ، وتقعد بقه تزعقلها ،،، وتبقى مشكلة كبيرة لو كسرت حاجة ، تلاقى صوتهم جاب لاخر الشارع من الزعيق ، النبي صلى الله عليه وسلم بقه عمره معملش كده مع أنس
خالص حتى لو عملت حاجة غلط ميقوليش أنت عملت كده ليه ، أي حاجه بعملها مش بيزعقله مش بيقولي كلام وحش
زي الناس اللي عندها ناس بتخدمهم ، فأحنا كمان نتعلم من النبي صلى الله عليه وسلم إن لو أحنا لو جبنا خادمة مثلا
تساعدنا في البيت أو تغسل لماما السجاجيد أو كده منقعدش نتعامل معاها على إن أحنا أحسن منها وإن هي خدامه
عندنا وإن أحنا نتأمر عليها ، لا بالعكس ده أنا لو أقدر أساعدها أساعدها ، ولو الدنيا حر أجبلها عصير من الثلاجة
او لو عايزة تشرب أجبلها ، مش معنى إن هي فقيرة أو بتخدمنا يبقى أحنا أحسن منها// ممكن تكون هي عند ربنا أحسن مننا كلنا
وتكون هي بتعبد ربنا أكتر مننا كلنا ، فعلشان كده أحنا بنتعلم كل حاجة عن النبي صلى الله عليه وسلم علشان نقلده في
حياتنا كلنا ونعمل في حياتنا زي ما النبي صلى الله عليه وسلم كان بيعمل
النهاردة بقه الحديث إيه
عن أنس بن مالك رضي الله عنه قال : قال رسول الله صلى الله عليه وسلم :

" الدال على الخير كفاعله "
قال رسول الله صلى الله عليه وسلم " الدال على الخير كفاعله "

🌸🌸🌸🌸🌸🌸🌸
يعنى إيه يا معلمتي الدال على الخير كفاعله ؟
يعني اللي بيدل حد على خير بيأخد ثواب زيه
يعني زي إيه مثلا ؟ يعني زي مثلا أنا دلوقتي علمت ....... الوضوء وعلمتها الصلاة كل لما ...... تتوضا وتصلي أنا بأخد ثواب
وبأخد حسنات علشان أنا اللي علمتها الوضوء والصلاة
يبقى أي حد هتعلميه أي حاجه حلوة في الدين أو هدليه على أي خير هتاخدي ثواب زيها
علشان كده فاكرين لما كنت بقولكم لما تتعلموا دعاء أو أي أذكار تروحوا تعلموهم لقرايبكم وأصحابكم ، ليه علشان تأخدوا حسنات كتير قوي
مش أحنا أتفقنا إن أحنا عايشن في الدنيا دي علشان نعبد ربنا ونعمل حسنات كتير

والحسنات دي لو كانت كتيرة هندخل الجنة

طيب والحسنات دي هنجبها منين نقعد نفكر في الأعمال اللي تجبلنا حسنات

طيب إيه يا معلمتي الأعمال اللي
تجبلنا حسنات


🌸🌸🌸🌸🌸🌸🌸
زي الدال على الخير كفاعله أدل الناس علي أي خير زي والدك لما راح يصلي صلاة الجمعة راح حد وزع
عليه ورقة إن في دار قرآن هتتفتح اللي عايز يروح يحفظ راح والدك مرحش يحفظ بس إده الورقة لصاحبه راح صاحبه
راح يحفظ دلوقتي مين هيأخد الثواب ؟ بابا طيب يا معلمتي ده بابا مبيروحش يحفظ قرآن ! هيأخد الثواب علشان هو
اللي عرف صاحبه المكان اللي هيحفظ فيه القرآن
طيب مامتي دلوقتي بتروح تحضر درس في المسجد قالت لصاحبتها ده في درس جميل بنحضره في المسجد إيه رأيك لما
تيجي معانا راحت صاحبتها معاها كل الحسنات أو القرآن اللي هتعملها مامتك هتأخد زيها
علشان الدال على الخير كفاعله يعني مثل ثوابه وزي ثوابه بالضبط
وزي إيه كمان مثلا أنا في البراعم ف الجامعة وقولت لصحبتي ده أنا في الجامعة وبنأخد حاجات جميلة قوي، قامت قالتلي طيب
أنا عايزة أقدم في الجامعة دي اقدم إزاي ، قولتلها إبعتي على الصفحة دي أو على الرقم ده راحت دخلت معانا الدورة
الجاية وبقت تحضر معانا ، فكل حاجة هتتعلمها أنت اللي هتأخدي الثواب وكل حاجة صح هتتعلمها أنت اللي هتأخدي
الثواب وأنت قاعدة في بيتك ، الله ده إحنا كده عايزين كل شوية نقعد نفكر بقه ونركز إيه الحاجات الحلوة اللي ممكن
أقول للناس تعملها علشان أخد ثواب إني أنا بعملها وأخد ثواب إن غيري عملها نبقى نقعد نفكر في حاجات كتيرة قوي
ممكن ندل الناس إنها تعملها .
🌸🌸🌸🌸🌸🌸🌸
مشرفة البراعم est déconnecté   رد مع اقتباس
قديم 03 - 10 - 2018, 02:21 PM   #4
منى محمد على النواوى
مشرفة براعم
 
الصورة الرمزية منى محمد على النواوى
 
تاريخ التسجيل: 09 2011
المشاركات: 559
افتراضي رد: تفريغ محاضرات العلوم الشرعية الفصل الدراسى الثانى

بسم الله الرحمن الرحيم
المحاضرة الثالثة
26/9/2018

*اسم الله الكريم* يعني ايه ...ربنا كريم
معني اسم الله الكريم ...

*الكريم ... هو كثييير الخير والعطاء ...*
يعني عنده خير كتييير قوي ...وبيعطي كتييير قوي

ومحدش ابدا ابدا يا اصحابي عنده خير اكتر من ربنا ولا بيعطي اكتر من ربنا

*💫يعني ايه ربنا كريم ...*
يعني ربنا بيضاعف لنا الحسنات .

*💫يعني ايه ربنا كريم ...*
يعني لما اعمل سيئه ... بتتكتب سيئه واحده بس ولو استغفرت الله وفضلت اقول استغفر الله استغفر الله
ربنا بيغفر ويعفو عني وهوقادر يعاقبني ...وهو قادر مش يغفر ...
لكن ربنا كريم وبيقبل مني ويغفر لي

💫*الكريم الذى يقدر ويعفو*

ربنا قادر يعاقبك لما تعمل حاجة غلط


لكنه تركك ولم يعاقبك.واعطاك فرصة تستغفرى عن اللى عملتيه.
منى محمد على النواوى est déconnecté   رد مع اقتباس
قديم 05 - 10 - 2018, 03:20 PM   #5
منى محمد على النواوى
مشرفة براعم
 
الصورة الرمزية منى محمد على النواوى
 
تاريخ التسجيل: 09 2011
المشاركات: 559
افتراضي رد: تفريغ محاضرات العلوم الشرعية الفصل الدراسى الثانى

بسم الله الرحمن الرحيم
المحاضرة الرابعة
3/10/2018


🌸 آداب العطاس 🌸

يعني ايه العطاس يعني لما باجي اعطس عارفين العطاس ليه فوائد كتيره جدا جدا وفي أدعيه المفروض نقولها انا دلوقتي لما باجي اعطس تعرفوا ان طبعا مفيش حاجه النبي صل الله عليه وسلم قال لنا عليها إلا وليها فائدة حتي لو احنا معرفناش الفايدة دلوقتي بنعرف بعدين
بس احنا مش بنعمل الحاجات اللي الرسول صل الله عليه وسلم قالنا عليها عشان ناخد الفايدة زي ما قولتلكم قبل كدا في آداب الطعام النبي صل الله عليه وسلم كان من آداب الطعام لعقة اصابع ( السبابه والابهام والوسطي ) لو انتِ جيتي وعملتي كدا قدام حد هيقولك ايه اللي انتِ بتعمليه دا دا انتِ كدا بتعملي حاجه مش حلوه وممكن يقولك كلام مش حلو . طيب انا دلوقتي هقولو لا انا بعمل حاجه النبي صلي الله عليه وسلم قالنا نعملها عرفنا بقي بعد كدا ان الاطباء اكتشفوا أن اللي يعلق الثلاث اصابع دول بيفرز انزيمات بتهضم الاكل تخلي الاكل يتهضم بسرعه

طيب انا دلوقتي لو جيت قولت الواحده النبي صل الله عليه وسلم قال اننا نعلق الثلاث أصابع دول هتقولي لا ايه اللي انتي بتقوليه دا دي حاجه وحشه مش هعمل كدا بس لو قالتلك بطني وجعاني من الاكل وانتِ قولتلها العقي الثلاث أصابع دول تفتكروا هتاخد ثواب ؟؟ لا طبعا لأنها عملت عشان بطنها متوجعهاش مش عشان النبي صل الله عليه وسلم بيعملوا .. اما احنا بقي المسلم مستسلم لله يعني ايه ؟ يعني بيعمل كل حاجه ربنا أمرنا بيها والرسول صل الله عليه وسلم أخبرنا بيها من غير ما نقول ليه و اشمعنى واقنعني طب قولي فايدتوا ايه مينفعش احنا مسلمين يعني بنستسلم للامر لربنا يعني بنفذ امر ربنا فطبعا احنا نعمل كدا دلوقتي ف العطاس بردوا لما بتعطسي كدا مره واتنين وتلاته قالك العلماء اكتشفوا أن العطس دا بيطلع بخار سام موجود ف المخ .. البخار السام دا لو قعد في مخنا ممكن نتعب بأمراض وحشه فربنا بيخلينا نعطس عشان البخار السام دا يخرج مع العطس شوفي عشان كدا بقي لما تيجي تعطسي من جوا قلبك اول كلمة تقوليها لما تعطسي ( الحمد لله ) تحمدي ربنا ان انتِ عطستي عشان لما عطستي الاخيره السامه خرجت من دماغك فلازم تشكري ربنا وتحمدي ربنا انه خرج منك الحاجات اللي كانت ممكن تضرك وتجبلك امراض طيب لما اجي اقول الحمد لله اقول ف سري ؟ لا اقول بصوت عالي ليه اقول بصوت عالي ؟ عشان النبي صل الله عليه وسلم قالنا ان احنا لما حد يعطس ويقول الحمد لله
نقوله يرحمك الله طب لو اللي عطس مقالش الحمد لله؟ منقولهوش يرحمك الله طب هتقوليلي ما انا قولت ف سري طيب ما هو اللي جنبك مسمعكيش فمش هينفع يقولك يرحمك الله الا لما يسمعك فلازم انتِ ترفعي صوتك عشان يقولك يرحمك الله طب ويعني هستفيد ايه لما يقولي يرحمك الله ما انا قولت الحمد لله خلاص ؟ لا طبعا هتستفيدي كتير انتِ لما قولتِ الحمد لله ومثلا ماما قالتلك يرحمك الله يعني ربنا ينزل عليكِ رحمته يعني ايه ربنا ينزل عليكي رحمته ؟ رحمة ربنا واسعه اوي الإنسان لو أصابته رحمة ربنا لو انتِ كنتِ مريضه هتتعافي لو انتِ كنتِ زعلانه هتبقي كويسه وفرحانه ولو مش عارفه تذاكري هتعرفي تذاكري لو اي حاجه وحشه في حياتك هتتغير عشان كدا دايما بندعي ربنا باسمه الرحمن الرحيم نقوله يارب برحمتك اشفيني يارب برحمتك ابعد عني الحزن يا رب برحمتك خلي ماما وبابا يتصالحوا يا رب برحمتك خلي اخويا يبقي كويس فكل حاجه انا عايزاها في الدنيا أطلبها برحمة
ربنا اطلب من ربنا يبقي رحمة ربنا دي جميله اوي يبقي لما ماما تقولي يرحمكم الله يعني بتدعيلك بدعوات كتيييره وجميله اوي بتدعيلك برحمة ربنا بتدعيلك تكوني سعيده دايما ... طيب تروحي انتِ تردي تقوليلها ايه في ناس بقي بتقول كلام من عندها وتقل يهدينا ويهديكم وفي ناس بتقول يغفر لنا ويغفر لكم وفي ناس بيقولو كلام غريب اوي لا احنا لازم نقول زي ما النبي صل الله عليه وسلم قالنا لا نزود كلمة ولا ننقص كلمة النبي صل الله عليه وسلم لما كان حد بيقولو يرحمكم الله كان بيقولو ايه يهديكم الله ويصلح بالكم ..

يبقي انا كدا اعتبر مثلا سلمي عطست فقالت ايه سلمي قالت الحمد لله راحت مامتها ردت عليها وقالت لها يرحمكم الله تروح سلمي تقول مامتها يهديكم الله ويصلح بالكم ... يعني ايه يهديكم الله يعني ربنا يهديكي لكل حاجه ترضي ربنا وتعملي كل الحاجات اللي يحبها ربنا طب يعني ايه يصلح بالكم ؟ يعني يا رب يبعد عنك اي حاجه يضايقك ويخلي بالك مرتاح ومتفكريش في حاجه تزعلك شفتوا بقي الدعوه جميله ازاي يعني بتقولها ربنا يريح بالك يا ماما ومفيش حاجه تضايقك ولا حاجه تقعدي تفكري فيها بضايقك ويهديكي ربنا جميل اوي لما انا بعمل حاجه غلط وماما تقولي ربنا يهديكي مش معناها انها بتشتمك دي دعوه حلوه عشان في أطفال يقعدوا يقولوا هو انا مجنونه انتي بتقوليلي ربنا يهديكي أو اخوكي الأكبر ماما تقولو ربنا يهديك ليه هو انا مجنون عشان ربنا يهديني لا دا ربنا يهديك دي دعوه جميله اووي طيب يبقي احنا بعد كدا نعمل ايه اول ما حد يعطس نشوف الاول قال الحمد لله ولا مقالش طيب لان النبي صل الله عليه وسلم قال ان هو لو قال الحمد لله وسمعناه نقوله يرحمكم الله مقالش منقولهوش يرحمك الله طيب في حاجه كمان احيانا في ناس حوالينا ميعرفوش الدعاء دا ميعرفوش بيقولوا ايه لما يعطسوا ممكن احنا نعمل ايه نعمل حاجه جميله جدا ان لما يجي حد جنبنا يعطس ومسمعناهوش قال الحمد لله نروح نقولوا ايه انتِ ليه مقولتيش الحمدلله وهي هتقولك اقول الحمد لله ليه ؟ نقولها مش انتِ عطستي النبي صل الله عليه وسلم قال لنا لما واحد يعطس يقول الحمد لله والتاني يقولوا يرحمكم الله وتروحي محفظاها يبقي انتِ كدا لما حفظتيها اخذتِ ثواب لان هي ممكن مكنتش تعرف وممكن تلاقوا اصحاب ليكم كتير في المدرسه ميعرفوش الدعاء دا .. حتي لو لقيتي صحبتك عطست ومقالتش الحمد لله قوليلها ابقي قولي الحمد لله بصوت عالي هتقولك ليه ؟ قوليلها اصل انا اتعلمت ان المفروض لما تعطسي تقولي الحمد لله وانا هقولك يرحمكم الله وانتِ تقوليلي يهديكم الله ويصلح بالكم ف انتِ لما بتقولي كدا بتاخدي حسنات كتيييره عشان انتِ بتعملي زي ما النبي صل الله عليه وسلم كان بيعمل يبقي انتِ كدا اخذتي ثواب ان انتِ علمتيهم حاجه كويسه يبقي انا دلوقتي لو انا عطست وقولت الحمد لله هتقولولي ايه ؟ يرحمكم الله هرد عليكم واقولكم يهديكم الله ويصلح بالكم الله دا انا فرحانه اوي لما اجي اعطس عشان اللي قدامي يدعيلي ويقولي ربنا يهديكِ ويريح بالك ومفيش حاجه تضايقك جميل اوي اوي الدعاء دا شفتوا بقي ان العطس دا اللي كنا بنضايق منوا ليه فوائد كتيره بس في آداب لازم نعملها في آداب العطاس ايه هي ؟ ان انا لما اجي اعطس أضع ايدي علي فمي مقعدش اعطس بصوت عالي لا لازم اكتم صوت العطس زي ما واحد بيجي يتاوب لازم يكتم التقويم من الشيطان ولما اجي اعطس معطسش بصوت أو اكتم صوت العطسه في دراعي يعني ارفع دراعي كدا وانا بعطس واروح عاطسه ف دراعي عشان صوت العطس يطلع منخفض مش عالي ... وفي ناس بيعطسوا في وجه اللي قدامهم طبعا دا غلط عشان مينفعش اتنفث في وش حد أو اعطس في وشو وكمان لو انا عندي برد ممكن أعديه مينفعش يبقي لازم نعمل آداب العطس ..

🌸 آداب العطس ايه؟
ان انا لما اجي اعطس اضع ايدي علي فمي عشان يكتم صوت العطسه وميطلعش صوتها عالي أو احط منديل أو اكتم العطس علي دراعي طيب في حاجه كمان لو انا عطست كذا مره اول مره قولت الحمدلله وردت ماما قالت يرحمكم الله وتاني مره عطست تاني وقولت الحمد لله وماما ردت قالت يرحمكم الله ثالث مره اقولها ايه شفاك الله وعفاكِ .. يعني اول مره وتاني مره اقولها يرحمكم الله ثالث مره اقولها شفاكِ الله وعفاكِ .

🌸🍃🌸🍃🌸🍃🌸🍃🌸

طيب النهارده كمان هناخد حديث جميل جدا جدا حديث النبي صل الله عليه وسلم ..
قال رسول الله صل الله عليه وسلم ( تبسمك في وجه أخيك صدقة )
فاكرين لما أخدنا في بداية الدوره اللي لو عملنا بردوا ناخد صدقه ؟ ( الكلمة الطيبه صدقه ) لما اتكلمنا وقولنا ان انا لما اقول لماما انا بحبك كدا باخد صدقه عشان قولتلها كلمه حلوه لما بابا يرجع من الشغل واقولوا وحشتني يا بابا كدا اخدت صدقه لما اقول لصحبتي انتِ شكلك جميل كدا اخدت صدقه اي كلمه هقولها لحد هاخد صدقه والصدقه دي حسنات كتيييره هتاخديها طيب الصدقه مش بس فلوس بروح احطها في الصندوق اعطيها للفقير في حاجات كتيره تبقي صدقه ليكِ النهارده هتاخد حاجه تانيه منها اخدنا الكلمه الطيبه صدقه وهناخد تبسمك في وجه أخيك صدقه

يعني ايه تبسمك ؟ يعني ابتاسمتك في وجه اختك أو اخيك صدقه طيب المقصود ايه هنا؟ ان انا اقعد اضحك هاهاها ها لا المفروض منضحكش بصوت عالي ونقعد نضحك بالطريقه دي لا احنا بنتكلم عن الابتسامه دلوقتي ماما قاعده جنبك بصي لماما وابتسمي ... وابتسمي يعني ايه ؟ يعني فاتحه شفايفك وضاحكه ضحكه بسيطه اوي كدا من غير صوت دي اسمها ابتسامه ..تخيلي لما ابتسمتي دلوقتي لماما أو لاخواتك انك أتصدقتي من غير ما تروحي تحوطي فلوس اخدت صدقه عشان ابتسمتي في وجه ماما وابتسمتي في وجه اختك أو اخوكي يبقي انا كل ما اشوف بابا ابتسم في وجه أو لما اشوف ماما ابتسم في وجهها ولما اشوف صديقتي ابتسم في وجهها اشوف خالتو جايه ابتسم في وجهها وابتسم في وجه كل الناس مش اول ما اشوف حد اروح مكشره طب اقفي كدا قدام المرايا واضحكي وشوفي وجهك هيكون شكلو جميل ازاي وكشري وشوفي وجهك هيكون وحش ازاي ... يبقي لما تضحكي بيكون وجهك جميل جدا بس احنا مش هنبتسم عشان يكون وجهنا جميل احنا هنبتسم لان الرسول صل الله عليه وسلم قالنا لو انتِ ضحكتي في وجه اللي قدامك بتاخدي حسنات واحنا زي ما قولنا واتفقنا ان احنا عايزين ناخد حسنات كتير اوي عشان نفسنا ندخل ايه ندخل الجنه والحسنات هتتوزن فبنحاول نجمع حسنات كتيره اووي عشان ايه عشان ندخل الجنه طيب طب انا بقي هستفيد ايه لو كشرت ؟ اقولكم علي حاجه كانت بتحصل زمان كان في محفظات القران كانو دايما يقعدوا يكشروا في وجه الناس زمان يعني كانوا بيكونو مكشرين علي طول فطبعا هما لما بيكشروا في وجه الناس كدا بيخلو الناس مش بيحبوا القران عشان هي بتعاملهم بقسوه وبتكشر في وجههم طب انتِ عارفه ان المحفظه دي اخذت سيئات ليه ؟ عشان خلت الناس متحبش القران عشان هي مش بتضحك معاهم لكن دينا أمرنا أن احنا نكون متديينين ونعمل اللي ربنا قالنا عليه بس يكون في نفس الوقت اخلاقنا طيبه ودايما الضحكه متفارقش وجهنا انتِ عارفه لو واحده مثلا بتعمل اي حاجه غلط وانتِ جيتي قولتلها وانتِ بتضحكي في وشها أو بتقوليها انا شوفتك بتعملي حاجه غلط في الصلاه وانا اتعلمت ان دا مينفعش وكلمتها براحه هتسمع كلامك وتقبل منك لكن لو انتِ دخلتي علي صحبتك وقولتلها بقولك ايه ايه اللي انتِ بتعمليه دا ومكشره في وجهها وبتزعقلها وتقوليلها دا انتِ هتدخلي النار دا ربنا مش هيقبل صلاتك عمرها ما هتسمع منك وهتضايق منك اصلا يبقي احنا المسلم لازم يكون وجهه بشوش يعني دايما يضحك في وجه الناس أو حتي لو انا زعلانه ايوا حتي لو انتِ زعلانه اضحكي عشان تاخدي ثواب عشان منبقاش طول الوقت مكشرين وزعلانين طب ليه مكشره وزعلانه ... يبقي انا حتي لو في حاجه مضيقاني اضحك مضحكش عشان انا فرحانه أو زعلانه لا اضحك عشان الرسول صل الله عليه وسلم قالنا تبسمك في وجه أخيك صدقه تعرفوا انا لما عرفت الحديث دا وبقيت اعملو جت بنت كدا في ثانوي وسألتني سؤال قالتلي انا عايزه اسالك سؤال قولتلها ايه قالتلي هو انتي ليه بتضحكي علي طول في وشنا روحت قولتلها عشان تبسمك في وجه أخيك صدقه يبقي انا كدا علمتها الحديث وخليتها ان شاء الله تعمل زي, 🌺
منى محمد على النواوى est déconnecté   رد مع اقتباس
قديم 17 - 10 - 2018, 01:14 AM   #6
مشرفة البراعم
طالبة علم بهمــة
 
تاريخ التسجيل: 01 2018
المشاركات: 62
افتراضي رد: تفريغ محاضرات العلوم الشرعية الفصل الدراسى الثانى

بسم الله الرحمن الرحيم
المحاضرة الخامسة
10/10/2018
🌸🌸🌸🌸🌸🌸
عن عائشة رضى الله عنها قالت ، قال رسول الله صل الله عليه وسلم ( من غشنا فليس منّا )
مين ام عائشة يا بنات ؟
زوجة الرسول صل الله عليه وسلم
يعنى ايه ؟!
هقولكم اول قصة ، النبى صل الله علي وسلم كان مرة ماشى ف السوق اتلقى راجل بيبع ، حط ايده جوا الطعام واخد حبة ف ايده فلقى الحبوب دى فيها مايه ، مع ان ال فوق ناشفة ، فالرسول صل الله عليه وسلم قاله
ما هذا البلل يا صاحب الطعام ، فالراجل قاله
يا رسول الله اصابتها السماء
طبعا النبى عارف ان المطرة هتبل الكل ال فوق وال تحت فعرف النبى انه كده بغيش ، فالنبى قاله حط البلل فوق عشان الناس تشوفه وبعدين الرسول قاله ( من غشنا فليس منّا )


🌸🌸🌸🌸🌸🌸
هقولكم يا حبايبي علي مثال تاني للغش بنشوفوا كتير
المدرس هو بيقبض المرتب بتاعه علشان
يشرح للطلبة بتوعه فى أطفال في المدرسة تلاقي المدرس مبيشرحش ويقول للطلبة بتاعته اللي عايز يفهم .... يدخل عندي الدرس كده بيغش ليه لأنه بياخد فلوس علشان يشرح طيب إزاي يعني ميشرحش
وياخد الفلوس يبقي فلوسه كده ميبقاش فيها بركة
🌸🌸🌸🌸🌸🌸
🔸وايه كمان يا معلمتي مثال الدكتور لما تروحله ويكشف عليك بحاجات بايظة وأنت تفتكرها سليمة أو يكتبلك علاج مش مظبوط علشان ياخد فلوس من شركة الأدوية لما يخلى الناس تشترى منهم أو يعملك عملية غلط كدههو كدهغش فمينفعش أي حد يشتغل أي حاجه يغش فيها طيب
🔸وأنا يا معلمتي ينفع أغش أنا طفل صغير أو أنا طفلة صغيرة ولا هنبني عمارة ولا الناس هتشتري مني حاجة
🔸 يا معلمتى أنا عارف أن الغش حرام وماما علمتني أن مينفعش أغش بس أنا
في الامتحان بلاقي صاحبى بيقولي أديني إجابة السؤال ده وعلشان هو ميزعلش مني بغششه السؤال
أنت كده مخدتش حسنات وأخدت سيئات علشان مينفعش أغش ومينفعش أغششما أنا لما أغشش حد
هخليه ينجح وهو مش فاهم حاجة ويكبر ويتعلم وهو مش فاهم حاجة وممكن يفضل يغش لحد ما
يبقي دكتور ويعالج الناس غلط ويموتهم أو يبقي مهندس مش فاهم حاجة يبني عمارة تتهد وتموت
الناس اللي فيها
🌸🌸🌸🌸🌸🌸
🔸 طيب انا لو نسيت في الامتحان حاجة مينفعش أغشها .. طب أعمل إيه ❓❓❓
أفضل ادعي ربنا يفكرني بيها
وإن شاء الله ربنا هيفكرك علشان أنت مش عايز تغش وتبقي من الناس الوحشين اللي قال عنهم النبي
صلى الله عليه وسلم في الحديث من غشنا فليس منا
🌸🌸🌸🌸🌸🌸
طب لو صاحبتى بحبها قوي وهتزعل منى لو مغششتها في الامتحان
طيب أعمل إيه يا معلمتي كده هي هتبعد عني ومش هتحبني طيب اأنتي عايزه صحبتك اللي ترضى عنك
ولا ربنا اللي يرضى عنك ؟ مش احنا قولنا أن رضا ربنا أهم من رضا الناس وقولنا لو ربنا قالنا نعمل حاجة وماما وبابا قالوا لينا نعمل حاجة تانية.... منسمعش كلامهم لأن كالم ربنا هو الأهم لأن ربنا اللي خلقنا ورزقنا وهو وحده اللي بنعبده
طيب أنت كده لما غششتى صاحبتك يبقي أنت بتحبي صاحبتك أكتر من ربنا
لا لا يا معلمتي أنا بحب ربنا أكتر من صاحبتي ...ومش هغس ولا هغشش حد أبدا تانى
علشان ربنا يحبنى ويدخلنى الجنة الجميلة


مشرفة البراعم est déconnecté   رد مع اقتباس
قديم 18 - 10 - 2018, 01:31 AM   #7
مشرفة البراعم
طالبة علم بهمــة
 
تاريخ التسجيل: 01 2018
المشاركات: 62
افتراضي رد: تفريغ محاضرات العلوم الشرعية الفصل الدراسى الثانى

بسم الله الرحمن الرحيم

المحاضرة السادسة

17/10/2018
🌸🌸🌸🌸🌸🌸

اسم الله القادر
يعنى ايه الله القادر ، احنا قولنا ان ربنا له اسماء كتيرة ولازم نعرفها و ندعى ربنا بأسمائه
ومنها 🌷🌷🌷🌷🌷: اسم القادر🌷🌷🌷🌷🌷
والقادر الذى لا يعجزه شئ ، يعنى مافيش حاجة صعبة ع ربنا ، يعنى كل حاجة ربنا يقدر يعملهلنا
ربنا قدرته كبيرة جدا جدا جدا
انت دلوقتى لو انا قولتلك لو ينفع انك تعمليلى عربية في يوم ، حد ف الدنيا دى كلها يقدر يصنع عربية ف يوم ، صعب !
طيب لو قولتلك خلى بابا يبنى عمارة ف يوم ، هتقوليلى لا ده العمارة بتاخد اوقات كتيرة ، صعب انه يعملها يوم
عارفة ان الله بقى سبحانه قادر على كل شئ ، مافيش حاجة ف الكون ده ميعرفش يعملها
💫ربنا قدرته كبيرة اوى وعظيمة اوى
حاجات كتيرة ممكن احنا نعملها بتاخد مننا اوقات كبيرة اوى ، لكن ربنا يعملها على طول يقول للشئ ( كن فيكون )
💫ربنا خلق الكون ده كله السموات والأرض والجبال وكل المخلوقات ربنا خلقها في ست أيام
انتو متخيلين ان السما دى ال انت شيفاها فوقيها سبع سموات وما بين كل سما وسما مسيرة سبعمائة الف سنة ، انت شايفة بس اول سما بتاعت الدنيا ، فالكون ده عظيم جدا من صنع ربنا
الاسماك ال عايشة ف البحار ربنا وحده هو ال قادر وحده يبعتلها اكلها ، فكل شئ ف الكون بكلمة يقول له كن فيكون
السحاب ده بيمطر بإذن ربنا ، لانه بيسمع كلام ربنا
يبقى كل شئ ف الكون بقدرة الله عزوجل
💫ربنا مافيش حاجة صعبة عليه ، ربنا قوى لا يحتاج لمساعدة احد ، والكون ده كله ملك ربنا ومش محتاج حد يساعده
اوعى تفتكرى ان الملايكة بتساعد ربنا ، لأ الملايكة لها وظائف زى الملاك ال بيكتب لنا الحسنات والسيئات
ملاك موقر بالمطر هو مسؤل بإذن ربنا ان المطر ينزل
💫ربنا قادر لو انا وانت عملنا حاجة وحشة ربنا يعقبنا ، ف نفس الوقت ربنا ينزل علينا عقاب عشان عملنا حاجة غلط ، 💫ربنا عشان انه رحيم بيدينا فرصة نستغفر ونتوب ومبيعجلش لينا العقوبة
فاكرين قصة اصحاب الفيل💫 💫
لما جيش ابرهة جه يهد الكعبة ، وجاب الفيل وجه عند الكعبة وقال للفيل زى ما هو مدربه انه يهدها ، فالفيل قعد مكانه مرضاش يقوم ، يحاول يقومه مش راضى خالص ، لية عمل الفيل كده ، لان الفيل سمع كلام ربنا لانه هو ال خلقه ، فربنا امر الفيل ميهدش الكعبة فسمع كلامه
💫 طيب فاكرين النار لما ابراهيم عليه السلام لما دعا قومه انهم يعبدوا ربنا ومرضوش يسمعوا كلامه ، فراح قومه جابو مكان وولعوا نااار فيها كبيرة اوى اوى وقالوا احنا هنرمى ابراهيم ونحرقه ف النار دى ، ومن شدة النار مش قادرين يقربه منها ، فقاله نحدفه من بعيد عشان النار متلسعناش ، فلما سيدنا ابراهيم دخل النار ، النار سمعت كلام امر ربنا لما قالها كونى بردا وسلامًا لابراهيم ما تحرقيش ابراهيم .
💫 طيب فاكرين فرعون اللى مكنش راضى أبداً انه يعبد ربنا ، ومش عايز الناس يبقوا مؤمنين ، لما موسى عليه السلام عدى البحر ، جه يعدى البحر ، ربنا جعله طريق يابس خلى البحر كده زى طريق يعدى عليه هو وال معاه ، واول ما جه فرعون وال معاه يعدوه بعدهم عشان يموت المسلمين !! ايه ال حصل؟! ، البحر رجع بحر تانى وغرق فرعون وال معاه ،💫 طيب مين ال أمر البحر يعمل كده !!! الله سبحانه وتعالى يقول للشئ كن فيكون
💫 فاكرين برضه لما ربنا أمر السكينة ، فاكرين العيد لما بندبح الخروف ليه ، عارفين قصة سيدنا ابراهيم ، لما شاف رؤية رؤية انه دبح ابنه اسماعيل ، فراح قال لابنه ، ولما الانبياء بتشوف رؤية لازم ينفذوها ، فسيدنا اسماعيل قاله افعل يا أبتى ما تأمر ، طيع كلام ربنا ، شايفين بقى الولد ال بيسمع كلام باباه ، مش زى البنت الوقت ال مبترضاش تسمع كلام مامتها ولا تعمل معها حاجة لو طلبت منها ، شوفتى سيدنا ابراهيم لما قال لابنه هدبحك ، قاله ادبح وسمع كلامه ، وده كان اختبار لابراهيم عليه السلام ، ولما جه يدبحوه ربنا أمر السكينة متتدبحش ،والسكينة سمعت كلام ربنا
فربنا قدرته كبيرة اوى ، قادر يعمل كل شئ ف الكون ويحيى كل الخلق ، ووحده ال بيعمل كل شئ
💫طيب نتعلم ايه بقى من اسم الله القادر💫

اننا ندعى ربنا بالحاجات ال نفسنا فيها ومش قادرين عليها ، نقول يارب انت القادر على كل شء ووحدك من تقول للشئ كن فيكون يارب اعملى كذاااا واطلب من ربنا ال انا محتجاه ، لو ربنا ادانى قوة وحسيت انى اقوى من صحباتى مضربهمش واعاملهم كويس ، ونتعلم كمان من اسم الله القادر ان احنا نشكر ربنا على كل شئ ف الكون ونعرف كل حاجة احنا عايزينها بإيد ربنا القادر وما أيأس ابدا من اى حاجة محتاجها واقول انها مش هتحقق ، فربنا هو ال دبر الكون ده كله وهو الوحيد ال يحاسبنا وال يجازينا ولو حد ظلمك فتأكدى ان ربنا وحدة هو ال هيجبلك حقك ، وتكونى واثقة بقدرة ربنا ، فلازم ما نعصيش ربنا ، عشان ربنا يحبنا ويحقق لنا كل شء احنا عايزينه
لو انا زعلانة وطلبت من ربنا يبعد عنى الحزن ده فاكون واثقة ان ربنا قادر يبعد عنى الحزن ده ، وزى ما قولنا القوى ميبقاش يعامل الاضعف منه او ال صحته ال اضعف منه يقعد يضربه او تقوللها مش هتقدرى تعمليلى حاجة ، لازم استخدم قوتى ف طاعة ربنا

💫 💫 فنتعلم ان ربنا القادر ع الاصلاح كل شئ ف حياتنا ، ولو احتاجنا أى حاجة مهما كانت قودامنا صعاب وبنقول مش معقول هتحصل نفتكر السكينة ازاى ما تدبحش ، النار ازاى ما تحرقش
ونفتكر قدرة ربنا في كل شئ ، ونكون واثقين في الله عزوجل
مشرفة البراعم est déconnecté   رد مع اقتباس
قديم 24 - 10 - 2018, 10:34 PM   #8
منى محمد على النواوى
مشرفة براعم
 
الصورة الرمزية منى محمد على النواوى
 
تاريخ التسجيل: 09 2011
المشاركات: 559
افتراضي رد: تفريغ محاضرات العلوم الشرعية الفصل الدراسى الثانى

المحاضرة السابعة
24/10/2018

اول ما الاذان يأذن
النبى قالنا اول مانسمع الاذان يأذن نعمل ايه نردد الاذان مع المؤذن\عغ
| اول مايقول الله اكبر الله اكبر نقول الله اكبر الله اكبر اول ما يقول اشهد ان لا اله الا الله نقول اشهد ان لا اله الا الله واول ما يقول اشهد ان محمد رسول الله نقول اشهد ان محمد رسول الله واول مايقول حى على الصلاه حى على الفلاح نقول لا حول ولا قوة الا بالله وحى على الصلاه يعنى يلا قومى صلى ف انتى هتقول لا حول ولا قوة يعنى انا مش هعرف اصلى غير لما انت تعينى يارب وجى على الفلاح يعنى حى على العمل لا حول ولا قوة الا بالله الله اكبر الله الله اكبر لا اله الا الله نقول زيه وبنلاقى ناس بتقول كلام غلط يعنى مثلا اول ما يأذن المؤذن يقول الله اكبر الله اكبر تقول الله اكبر الله اعظم طبعا الرسول قالنا لازم نقول ورا المؤن منقولش كلام غير كلامه لان الرسول قال اذا سمعتم النداء فقولوا مثل ما يقول المؤذن
بعد مايخلص الاذان
نقول اللهم رب هذه الدعوة التامه والصلاة القائمة ات محمدا الوسيلة والفضيله وابعثه مقاما محمودا الذى وعدته
فى حجات غلط بيقولوها الناس هما بيقولوا ات سيدنا محمد والرسول بيقول ات محمدا من غير سيدنا هنقولهم النبى مقالش نقول فى الدعاء سيدنا يبقا انا لو قولت سيدنا كدا مش بسمع كلام الرسول ومش هنقول والدرجة العاليه الرفيعه دى غلط ومقولش انك لاتخلف الميعاد لانى دى زياده ضعيفه جت فى حديث ضعيف فمينفعش نزود كلام من عندنا
لو قولنا الدعاء دا النبى هيشفعلنا يعنى ايه النبى هيشفعلنا يعنى يتوسطلنا عند ربنا يعنى لو عندنا شوية سيئات كانت ممكن تدخلنا النار ومندخل الجنه النبى علشان كنا بنقول الدعاء دا بعد كل اذان النبى هيتوسطلنا عند ربنا انى ميدخلناش النار علشان كنتى بتحافظى على ترديد الاذان واقول الدعاء علشان النبى يتوسطلنا ويشفعلنا وربنا ميدخلناش النار
الدعوه التامه عى كلمة لااله الا الله والصلاة القائمه التى تقام اللى احنا هنصليه ات محمدا الوسيلة والفضيله ايه الوسيله ؟ وايه الفضيله ؟ الوسيله هى اللى قال الرسول انها منزله فى الجنه لا تكون الا لعبد واحد وارجو ان اكون هذا العبد والفضيله هى المرتبه الزائده عن سائر الخلائق وابعثه مقاما محمودا ما هو المقام المحمود؟ انى النبى بيكون يوم القيامه فى مقام بيحمده عليه الخلائق يوم القيامه واكثر العلماء قالوا انها الشفاعه العظمى فاالنبى هيروح يشفعلنا عند ربنا انتوا عارفين انى كل الانبياء هتقول نفسى نفسى والنبى هيقول امتى امتى مش هيرضى يخلينا ندخل النار وعاوزنا نخل الجنه ف النبى هو اللى له المقدره انه يشفعلنا وربنا يشفعه فينا فاالحديث يحثنا ان نقول الدعاء علشان الرسول يشفعلنا ولو عندنا ذنوب ربنا يغفرهالنا وانى احنا مينفعش ندعى حد الا ربنا ماشى واتعلمنا انى النبى له مكانه كبيره اوى وربنا هيبعثه مقام كبير ليس لمكان لاحد الا النبى ..
انتوا عارقين انى البشر يوم القيامه هيروحوا فى المكان اللى هيكون فيه الحساب هيقولوا للانبياء اشفعلنا عند الله للحساب هيقولهم روحوا لنوح ونوح ويعتذرلهم هيقولهم روحوا لابراهيم عليهم السلام وابراهيم هيعتذرلهم ويقولهم روحوا لعيسى هيروحوا لعيسى يقولوله خلى ربنا يقدم الحساب هيقولهم روحوا لمحمد ف النبى هيقول انا لها انا لها فيقوم النبى فيسجد تحت العرش ويثنى على الله ويحمد ربنا ويسجد لربنا وربنا هيقوله يامحمد ارفع راسك وسل تعطى واشفع تشفع فا النبى هيشفعلنا ف اللى بيحب النبى يقول الدعاء بعد الاذان
عاوزين نحافظ على الدعاء علشان ناخد حسنات كتير انى احنا بنعمل سنة النبى صلى الله عليه وسلم وكمان يوم القيامه نكون من الناس اللى ربنا بيحبهم ويشفعلهم علشان هما كانوا بيرددوا الاذان ويقولوا الدعاء بعد الاذان
منى محمد على النواوى est déconnecté   رد مع اقتباس
قديم 01 - 11 - 2018, 01:00 AM   #9
مشرفة البراعم
طالبة علم بهمــة
 
تاريخ التسجيل: 01 2018
المشاركات: 62
افتراضي رد: تفريغ محاضرات العلوم الشرعية الفصل الدراسى الثانى

بسم الله الرحمن الرحيم
المحاضرة الثامنة 31/10/2018

🌼 الصلاة 🌼
قولنا ايه .. قولنا ان اركان الاسلام خمسه شهادة ان لا اله الا الله وان محمد رسول واقام الصلاة وايتاء الزكاه وصوم رمضان وحج البيت لمن استطاع اليه سبيلا وقولنا الاركان اللى زى العواميد .. اقول اركان البيت يعنى عواميد البيت مينفعش بيت يتبنى من غير عواميد فلو بنينا الشقه بتاعتنا من غير عواميد تقع عشان العواميد اللى بتسند البيت
الرسول كان لما يعوز يعلمنا حاجه كان بيبعت لجبريل وجبريل عليه السلام كان بينزل الارض من السماء ويعلمه القرآن ويعلمه ربنا امرنا ب ايه وقالنا ايه منعملهوش فكان كل مره لما ربنا يقولنا نعمل حاجه كان يبعت مين للنبى ؟ جبريل عليه السلام
الا حاجه واحده اللى ربنا علمها للرسول فى السماء وهى🌼 الصلاه🌼
كل العبادات اتفرضت علينا فى الارض الا الصلاه بقا اتفرضت فى السماء
🌼ازاى بقا اتفرضت فى السماء ؟ 🌼

كان فى سنه النبى صلى الله عليه وسلم ماتت خديجه رضى الله عنها زوجته اللى كان بيحبها اوى اوى اوى وكان حزين عليها اوى ومات عمه ابو طالب اللى كان بيقف فى ضهره وبيدافع عنه لما الناس الوحشين كان بيأذوا النبى عشان بيقولهم اعبدوا ربنا وماتعبدوش التماثيل والاصنام اللى انتوا بتعبدوها دى
لذلك سمى العام هذا بعام الحزن لانه مات فيه اكتر اتنين بيحبهم بعد كدا ربنا امر جبريل انى ينزل من السماء للارض وياخد النبى صلى الله عليه وسلم فى رحله رحله اسمها رحلة الاسراء والمعراج .. اخده ومشى بيه لغاية بلد اسمها فلسطين فى الشام وهناك المسجد الاقصى كلنا عارفينه صلى النبى صلى الله عليه وسلم بالنبياء كلهم امام يعنى هو الامام والانبياء كلهم بيصلوا وراه وبعد كدا اخده جبريل عليه السلام وطلع فوق فى السماء وكل سما يطلعها يقابل نبى من الانبياء السماء الاولى ولتانيه والتالته الرابعه الخامسه السادسه السابعه لغاية ما وصل للسابعه وربنا كلم النبى صلى اللى عليه وسلم وفرض عليه كام صلاه ؟ خمسين صلاه تخيلى خمسين صلى يعنى ممكن اتصل بيكى ياساره صليتى تقوليلى انا فى رقم 17 وانتى صليتى تقولى انا فى رقم 22 وانتى ياهبه انا قى 33 يعنى طول اليوم هنفضل نصلى نصلى نصلى عشان نصلى الصلاه اللى امرنا ربنا بيها فكان فى السماء السادسه موسى عليه سلام فلما نزل وكلم موسى وقاله انى ربنا فرض علينا 50 صلاه قاله اسال ربنا انه يخفف عن امتك وفعلا النبى صلى الله عليه وسلم طلب من ربنا انه يخفف عنه فقل شويا فنزل لسيدنا موسى فقاله فقاله سيدنا موسى اسال ربنا انه يخفف وفضل النبى يطلب من ربنا انه يخفف لغاية ما الصلوات دى بقيت 5 صلوات بس .. 5 صلوات فى العدد و50 فى الاجر(الفجر والضهر والعصر والمغرب والعشاء )
ف احنا ربنا خفف علينا كتير وبعد كدا بردو فى ناس مكسلين ومش عاوزين يصلوها
انتوا عرفين الصلاه دى مهمه اوى اوى اوى واول حاجه الانسان لما بيموت وبيروح عند ربنا اول حاجه بيتحاسب عليها الانسان هى الصلاه فان صلحت صلح عمله كله وان فسدت فسد عمله كله وعمله بيقا مش حلو
الشيطان بقا عارف انى الصلاه دى مهمه اوى اوى وعارف انى اللى بيصلى حتى لو بيعمل حجات وحشه هيبطلها وعارف انى اللى بيصلى عارف انى الصلاه دى بتغفر الذنوب فعشان كدا اكتر حاجه بيخطط فيها يقول انى يخطط ازاى ميخلناش نصلى يقعد يوسوسلنا ميخلناش نصلى .. اصلى لو احنا صلينا عارف انى احنا كدا هندخل الجنه وربنا هيسامحنا وانى دى اول حاجه بنتاسب عليها وكان النبى لما كان بيبعت حد يدخل بلد علشان يدعوا الناس للاسلام فكان بيقولهم ايه.. شهادة ان لا اله الا الله وان محمد رسول الله هى اول ماتدعوهم اليه واعبدوا ربنا ومتعبدوش التماثيل دى لو سمعوا كلامكوا فان اطاعوكم فاخبروهم ان الله افترض عليهم 5 صلوات كل يوم
يبقا اول حاجه الشهادة وتانى حاجه الصلاة علشان كدا الصلاه دى مهمه جدا علشان كدا الشيطان اكتر حاجه بيهتم بيها انى هو مش عاوزنا نصلى واحنا طبعا عمرنا ما هنسمع كلامه
النبى صلى الله عليه وسلم كان بيحب 🌼الصلاه🌼 اوى اوى وكان لو حاجه دايقته او حزين يفزع للصلاه على طول يدعى ربنا وكان النبى صاحبه اسمه بلال وكان صوته جميل اوى فى الاذان وكان هو مؤذن النبى صلى الله ليه وسلم
كان النبى صلى الله عليه وسلم يقوله ايه عشان يأذن ؟؟ يقوله (ارحنا بها يا بلال ) يعنى عاوزين نصلى يابلال نادى على الصلاه عشان عاوزين نصلى ونرتاح يبقا الصلاه دى راحه وحاجه جميله جدا
يعنى الانسان لو مدايق مفروض يصلى ولو اى حاجه مزعلاه يصلى ويدعى ربنا لكن الشيطان بقا بيقعد يخطط ازاى يخلينا منصليش
واحد جاء للنبى وقاله يارسول الله ايه احب الاعمال الى الله يعنى ايه اكر حاجه ربنا بيحبها عمل اعمله قاله الصلاه على وقتها(احب الاعمال الى الله الصلاه على وقتها )يعنى اكتر حاجه ربنا بيحبنا نعملها الصلاه فى وقتها
__________________
يلا بقا علشان نصلى
فى ناس تقول قبل ماتصلى نويت اصلى العشاء

هل ينفع نقول نويت اصلى؟
لا .. ربنا يعلم انى احنا هنصلى وانا بصلى ببقا باصه فى الارض مكان ماهسجد مش ببص على اى مكان سواء ع السقف او على ماما وهى معديه ولا ابص على اى حاجه ببص مكان السجود اللى هسجد فيه وبعدين اكبر وانا ضامه صوابعى وارفعها عند ودنى او عند كتفى وكانها واحد مضموم زى الالف ونرفع ايدنا

🌼🌼ونقول الله اكبر ونبقا باصين فى اتجاه الكعبه 🌼🌼
بعدين هحط ايدى اليمين على ايدى الشمال على صدرى مش هحطها فى نص بطنى واروح ابصى فى الارض واقرا الفاتحه واقرا سوره من اللى انا حفظاها وهقرا السور بالراحة واتغنى بالقران واقرا بالراحه واحط ايديا تانى على ودنى واقول الله اكبر وانزل اركع ايدى على رجليا وضهرى مفرود زى التربيزه لو حطيت كوبايه تقف على ضهرى متقعش وارفع من الركوع وارفع ايديا تانى عند ودنى واقول سمع الله لمن حمده

🌼🌼واقول ربنا ولك الحمد🌼🌼
واروح منزله ايدي وانزل اسجد احط كف ايدى على الارض ودراعى كله ارفعه من على الارض واقول سبحان ربى الاعلى سبحان ربى الاعلى سبحان ربى الاعلى وارفع احط ايديا على رجليا

🌼🌼واقول رب اغقر لى رب اغفر لى🌼🌼
واسجد سجده تانيه واقول سبحان ربى الاعلى وبعدين اقوم اقول الله اكبر وابدا ركعه تانيه زى الاولانيه بالظبط بس الفرق نى الركعه الاولى والثانيه بقرا مع الفاتحه صورة قصير انما التالته والرابعه ممكن اقرا الفاتحه بس وبعد ما اخلص الركعه الاولى زى التانيه وبعدين هقرا التحيات هحط كل ايد على ركبه وممكن ارفع السبابه من اول التشهد واقول التحيات لله

ومش هحركه النبى قالنا احركه حركه ارتعاشه من غير ما اطلع

وانزل او ارفع السبابه فقط عند الشهاده او اخليه واقف ثابت وواقف بس واقول التحيات لله والصلوات والطيبات السلام عليك ايها النبى ورحمة الله وبركاته السلام علينا وعلى عباد الله الصالحين اشهد ان لا اله الا الله واشهد ان محمد عبده ورسوله اللهم صل على محمد وعلى ال محمد كما صليت على ابراهيم وعلى ال ابراهيم انك حميد مجيد اللهم بارك على محمد وعلى ال محمد كما باركت على ابراهيم و على ال ابراهيم فى العالمين انك حميد مجيد

اخد بالنا مش بنقول سيدنا محمد فى التحيات

بنقول محمد على طول وبعد كدا اسلم ناحية اليمين زاقول السلام عليكم ورحمة الله وابص كويس واروح ابص فى الشمال على طول واقول السلام عليكم ورحمة الله

مش ببص فى النص خالص

مشرفة البراعم est déconnecté   رد مع اقتباس
قديم 08 - 11 - 2018, 09:52 AM   #10
مشرفة البراعم
طالبة علم بهمــة
 
تاريخ التسجيل: 01 2018
المشاركات: 62
افتراضي رد: تفريغ محاضرات العلوم الشرعية الفصل الدراسى الثانى

المحاضرة التاسعة
7/11/2018
تدريب عملى
الوضوء

اول حاجه البسمله نقول بسم الله ونبدا نغسل ايدينا الى المرفقين تلات مرات وبعدين نستنشق ونتمضمض تلات مرات و بعد كدا نغسل وجهنا تلات مرات وبعد كدا نغسل ايدينا اليمين لغاية الكوع تلات مرات وايدينا الشمال لغاية الكوع تلات مرات ونغسل صوابعنا كمان معاها من اول صوابعنا لغاية الكوع وبعد كدا نعمل شعرنا مره واحده رايح جاى واعمل ودنى مره واحده صباع جوا وصباع برا والف ايدى عشان ابقا غسلتها برا وجوا وبعد كدا اغسل رجلى اليمين تلات مرات ورجلى الشمال تلات مرات وبعدين

🌼🌼اقول دعاء الوضوء 🌼🌼
اشهد ان لا اله الا الله وحده لا شريك له واشهد ان محمد عبده ورسوله
كدا بقا خلصنا الوضوء

يلا بقا علشان نصلى
فى ناس تقول قبل ماتصلى نويت اصلى العشاء

هل ينفع نقول نويت اصلى؟
لا .. ربنا يعلم انى احنا هنصلى وانا بصلى ببقا باصه فى الارض مكان ماهسجد مش ببص على اى مكان سواء ع السقف او على ماما وهى معديه ولا ابص على اى حاجه ببص مكان السجود اللى هسجد فيه وبعدين اكبر وانا ضامه صوابعى وارفعها عند ودنى او عند كتفى وكانها واحد مضموم زى الالف ونرفع ايدنا

🌼🌼ونقول الله اكبر ونبقا باصين فى اتجاه الكعبه 🌼🌼
بعدين هحط ايدى اليمين على ايدى الشمال على صدرى مش هحطها فى نص بطنى واروح ابصى فى الارض واقرا الفاتحه واقرا سوره من اللى انا حفظاها وهقرا السور بالراحة واتغنى بالقران واقرا بالراحه واحط ايديا تانى على ودنى واقول الله اكبر وانزل اركع ايدى على رجليا وضهرى مفرود زى التربيزه لو حطيت كوبايه تقف على ضهرى متقعش وارفع من الركوع وارفع ايديا تانى عند ودنى واقول سمع الله لمن حمده

🌼🌼واقول ربنا ولك الحمد🌼🌼
واروح منزله ايدي وانزل اسجد احط كف ايدى على الارض ودراعى كله ارفعه من على الارض واقول سبحان ربى الاعلى سبحان ربى الاعلى سبحان ربى الاعلى وارفع احط ايديا على رجليا

🌼🌼واقول رب اغقر لى رب اغفر لى🌼🌼
واسجد سجده تانيه واقول سبحان ربى الاعلى وبعدين اقوم اقول الله اكبر وابدا ركعه تانيه زى الاولانيه بالظبط بس الفرق نى الركعه الاولى والثانيه بقرا مع الفاتحه صورة قصير انما التالته والرابعه ممكن اقرا الفاتحه بس وبعد ما اخلص الركعه الاولى زى التانيه وبعدين هقرا التحيات هحط كل ايد على ركبه وممكن ارفع السبابه من اول التشهد واقول التحيات لله

ومش هحركه النبى قالنا احركه حركه ارتعاشه من غير ما اطلع

وانزل او ارفع السبابه فقط عند الشهاده او اخليه واقف ثابت وواقف بس واقول التحيات لله والصلوات والطيبات السلام عليك ايها النبى ورحمة الله وبركاته السلام علينا وعلى عباد الله الصالحين اشهد ان لا اله الا الله واشهد ان محمد عبده ورسوله اللهم صل على محمد وعلى ال محمد كما صليت على ابراهيم وعلى ال ابراهيم انك حميد مجيد اللهم بارك على محمد وعلى ال محمد كما باركت على ابراهيم و على ال ابراهيم فى العالمين انك حميد مجيد

اخد بالنا مش بنقول سيدنا محمد فى التحيات

بنقول محمد على طول وبعد كدا اسلم ناحية اليمين زاقول السلام عليكم ورحمة الله وابص كويس واروح ابص فى الشمال على طول واقول السلام عليكم ورحمة الله

مش ببص فى النص خالص
مشرفة البراعم est déconnecté   رد مع اقتباس
رد

أدوات الموضوع
طرق مشاهدة الموضوع

تعليمات المشاركة
لا تستطيع إضافة مواضيع جديدة
لا تستطيع الرد على المواضيع
لا تستطيع إرفاق ملفات
لا تستطيع تعديل مشاركاتك

BB code is متاحة
كود [IMG] متاحة
كود HTML معطلة

الانتقال السريع إلى


جميع الأوقات بتوقيت GMT +3. الساعة الآن 05:29 AM.


Powered by vBulletin® Version 3.8.4,
Copyright ©2000 - 2018, Jelsoft Enterprises Ltd
جميع الحقوق محفوظة لـ الجامعة العالمية للقرءان والسنة والقراءات